حكاية الساحرة الشريرة

فى مرة كنت بتناقش مع احد اصدقائى وبنتكلم عن الامل والمسار السياسى المصرى وكنا وقتها تحت حكم المجلس العسكرى . الغريب ان برغم كل اللى كانت بلدنا بتتعرضله كان مازال جوانا الامل ببكرة تتحقق فيه كل مطالبنا ( عيش – حرية – عدالة اجتماعية – كرامة انسانية ) وكنا بنشبه نضال الثوار بالقصص الخيالية اللى الابطال بتحارب فيه قوى الشر المتمثلة فى الساحرة الشريرة . عمرنا ماكنا هنستمتع بانتصار الامير لو مكانتش الحرب النهائية بينه وبين الساحرة مثيرة للاهتمام والفضول والتعجب كمان . لازم قبل ماتتكتب النهاية يكون الابطال واجهوا الاهوال وخرجوا منها سالمين غانمين . عشان كدة مينفعش نفقد الامل لان الحكاية هتكون مثيرة . هنمر فيها بمراحل كتير هنبهر بيها العالم وهتتكتب فى التاريخ بحروف من نور لان المصريين مش ناس عاديين ولو مش مصدقنى ارجع لكتب التاريخ وهى تحكم بينا .وعلى فكرة مش مهم السلاح اللى مع الاشرار لان الحق دايما هو اللى بينتصر 

هوا دا الصيام يا مسلمين !!

رمضان بدأ كل سنة وبلادنا كلها بخير . اول ما بييجى الشهر الفضيل دا الواحد بقى بيبدأ يراجع نفسه ويشوف اخطاؤه ويحاول يصلحها وبصراحة مفيش فرصة احسن من كدا . بس لاحظت حاجة ان كل شوية زعيق وخناق ف الشارع والناس ماسكة فرقاب بعض على حاجات تافهة اوى ولا المواصلات والاشارات مينفعش يبقى فى عليها تعليق . وكله كوم والشتايم كوم تانى خالص . طب ينفع كدة برضو والشئ اللى بجد يخوف ان الموضوع دا بقى العادى واللى بنتوقعه كل سنة . يا رب نتعلم – وانا اولكم طبعا – ان رمضان هو الشهر اللى بنصوم فيه عن المعاصى قبل الاكل والشرب وبنعامل فيه الناس باخلاق الاسلام ومش معنى انى صايم ان دا مبرر لانى اخبط فالرايح والجاى . ولا انتم رأيكم ايه ...

نضف اللى جوا اﻻول

 بلدنا مليانة مشاكل محدش يقدر ينكر و اكيد الثورة نورت جوانا ضوء خفى ﻻجل مانمحى كل ضلام الظلم فى ركن فيكى يا مصر

بس يا اخى الغريب ان برغم كدة محتاجين ثورة تانية مش قصدى ضد النظام الفاسد بس ضدنا احنا و على فكرة دى مش  غلطة مطبعية وحقولك ليه

كام واحد مننا بيظلم غيره عشان قرش زيادة مش من حقه . كام واحد بيطفش زمايله فالشغل عشان مش فى شلته . كام واحد ضرب اسفين ارض ارض عند مديره عشان يعرف يسرق براحته . كام واحد فينا ديكتاتور وحرامى زيه زى الحكم اللى بيثور عليه

بامانة فرقت ايه .. الاولى بيك تثور على نفسك ولازم نقف وقفة كبيرة مع نفسنا يمكن نقدر نتغير

إنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنفُسِهِمْ 

 صدق الله العظيم